fbpx

مرض الزهايمر

مرض الزهايمر - هوسبيتاليا

مش فاكر أسامي قرايبك؟
نسيت انت حطيت النضارة فين؟
مش فاكر صليت و لا لسة؟
والدك أوقات بينسي ياكل أو يشرب مياه؟
والدتك دايما سرحانة و مش مركزة معاك في الكلام ؟!!

الزهايمر بيبتدي بالتدريج و للأسف علي ما بنبدأ نلاحظه بيكون إتمكن من شخص عزيز عليك و في الوقت ده بيتحول دور العلاج من مجرد وقاية لوسيلة لمحاولة تقليل تطور المرض و توقفه علي الوضع الحالي .

فيه نوع من الألزهايمر بيبتدي في سن مبكر (قبل سن ٦٥ سنة) و بدأ ينتشر في السنوات الأخيرة.

ما تستناس لحد ما يفوت الأوان و إطلب المشورة الطبية لو حسيت بأي مشاكل في الذاكرة أو التركيز أو القدرة علي عمل الحاجات اللي كنت بتقدر تعملها قبل كدة.

التشخيص المبكر هو كلمة السر لأمراض الذاكرة في كبار السن زي الخراف Dementia و اللي الألزهايمر Alzeheimer نوع منه للسيطرة علي المرض و تعليم الأسرة إزاي تتعامل مع المريض و عمل نظام يومي متكامل له من نظام أكل و رياضة و تمارين ذهنية تساعده .

غالبا مش هيشتكيلك…إنت اللي لازم تاخد بالك و تحس بيه و تساعده.

موجودين في معظم البيوت أبائنا و أجدادنا مرضي ألزهايمر اللي بيعانوا في الحياه.
ماحدش فاهمهم و لا هما فاهمين ايه اللي بيحصل حواليهم.
طب إزاي تتعامل معاه و توفرله بيئة مناسبة يقدر يعيش فيها بأمان من غير ما يأذي نفسه أو يتسبب في ضرر لأي حد حواليه؟

خلينا نفهم الأول إيه الأعراض اللي بتحصل للمريض :

الموضوع بيبدأ بشوية مشاكل في الذاكرة و خاصة الذاكرة القصيرة الأمد يعني ينسي الحاجات الجديدة اللي ممكن يكون لسة عاملها لكن فاكر ذكريات زمان كويس،مع تطور المرض بيبدأ يأثر علي التفكير و إتخاذ القرارات و الإنتباه و التصرفات و اللغة و الكلام بيبقي غير مفهوم.
بيفقد المتعة بالحاجات اللي كانت بتبسطه و بيتعصب كتير وأحيانا بيحصل هياج شديد في الحالات المتقدمة و حركته بتقل يوم ورا يوم و بيفقد القدرة علي عمل أبسط متطلبات الحياة اليومية من أكل و شرب و لبس و نظافة شخصية و غيره و ده بيعرضه لمشاكل صحية تانية كتير.

نكرر تاني و تالت إن التشخيص المبكر هو أهم حاجة لوقف تطور المرض و وصوله لمراحل صعبة العلاج مش هيفيد فيها.

تعالي بقي نشوف إزاي نقدر نتعامل مع مريض ألزهايمر بطريقة سليمة؟

– أهم حاجة بالنسبة لمريض ألزهايمر إن دايما نحسسه أن هو لسة شخص مهم في الأسرة و إن له دور مهم و رأيه مهم زي ما كان،لأن هو دائما بيكون حاسس إن تأثير المرض عليه خلاه دايما محتاج المساعدة و ده بيخليه حساس جدا و محبط جدا و حاسس إنه ما بقاش زي الأول الشخص القوي القائد اللي بياخد القرار و اتحول لشخص ضعيف مغلوب علي أمره و إوعي ماهما عمل تحسسه انك متضايق منه أو إنه حمل تقيل عليك لأن انت كدة فعليا بتقتله.

– نظم يومه بطريقة روتينية في مواعيد كل حاجة من أكل و شرب و نوم و إستحمام.

– خليه دايما يعمل أي حاجة بيقدر يعملها و خليه يشارك في النشاطات اليومية زي الأكل و لبس الهدوم حتي لو كان مش بيقدر يعمل كدة…أي مشاركة بسيطة هتفرق معاه.

– قلل أي حاجة ممكن تشتت إنتباهه أثناء الحوار معاه يعني اختار مكان هادي و إطفي التليفزيون أو أي حاجة عاملة دوشة و قرب منه و بصله و انت بتكلمه و خلي صوتك في درجة مسموعة بالنسبة له.

– في أي حوار معاه لازم المحادثة تكون ثنائية…تدخل أكتر من شخص هيخليه مشتت وغير منتبه.

– إتكلم معاه بلغة بسيطة جدا و وصله اللي عايز تقوله بأقل الكلمات، و ما تبطلش كلام معاه حتي لو بقي غير مستجيب لكلامك.

– ما تجادلش معاه في أي حاجة لأنك مش هتوصل لأي حاجة.

– إحترم رغباته و خليه دايما يختار الحاجات البسيطة زي هيأكل إيه مثلا بس ماتديلوش اختيارات كتير عشان مايتوهش منك.

– خليك دايما هادي و متفهم لطبيعة المرض و إنه بيأثر علي السلوك يعني ممكن شخصيته تتغير جدا و تلاقيه بيشم و يقول كلام عمره في حياته ما قاله قبل كدة.إستحمله زي ما هو إستحملك و انت طفل صغير.

– وفر ليه بيئة آمنه حواليه عشان ما يقعش أثناء التحرك في البيت.بلاش أثاث كتير في البيت يادوب الحاجات الأساسية و الأماكن اللي بيمشي فيها تكون فاضية خالص و مش مفروشة سجاد عشان ما يتكعبلش.

– إقفل الأبواب و البلكونة و الشبابيك كويس بالظبط كأن عنك طفل صغير.

– في المراحل المتقدمة من المرض بيكون فيه مشاكل في البلع و ده ممكن يخليه يشرق و هو بياكل فلازم تخلي بالك جدا لأنه لو شرق ممكن يحصل إلتهاب رئوي و اللي بيكون خطير في كبار السن.

كل ما قدرنا نشخص المرض بدري و نتعامل معاه بطريقة سليمة كل ما بنوفر لأبائنا و أجدادنا حياه مناسبة لهم.

‎دكاترة هوسبيتاليا معاكم ٢٤ ساعة طوال أيام الاسبوع لأي استفسار او زيارة منزلية

‎كلمنا دلوقتي علي 01100080900

Call Now Button
Need Help? Chat with us