fbpx

القدم السكري

القدم السكري هوسبيتاليا

من أكتر الأمراض المزمنة انتشاراً هيا مرض ارتفاع نسبة السكر في الدم (السكري) … هوسبيتاليا هتستعرض معاكم بعض المعلومات عن واحدة من أهم المضاعفات و هي (القدم السكري ) ….

من أكتر مضاعفات مرض السكر إنتشارا و خطورة هي مشاكل القدم السكري !!!

أي مشكلة بسيطة ممكن تحصل لشخص عادي زي جرح صغير و هو بيقص ضوافره أو خدش بسيط ممكن ما نلاحظهوش بالنسبة لمريض السكر لو ما تعاملناش معاه بشكل سليم ممكن يعمل مشكلة كبيرة جدا قد تؤدي لا قدر الله إلي البتر أو حدوث تسمم بالدم أو إلي الوفاة !!

طب تعالوا نشوف ليه مريض السكر بيكون عرضة أكتر من أي حد تاني لمشاكل القدم؟

• أول حاجة لازم نعرف إن مشكلة القدم السكري دي مشكلة مزمنة يعني بتاخد وقت طويل لحدوثها و ما بتظهرش في يوم و ليلة عشان كدة مهم جدا فحص القدمين في مريض السكر بانتظام عشان وقت ما نلاحظ أي مشكلة صغيرة نقدر نلحقها و نتعامل معاها قبل ما تكبر و تدخلنا في مضاعفات أكبر و أكتر.

• مريض السكر مع الوقت و بمرور السنين السكر بيأثر علي الأعصاب الطرفية خاصة في منطقة القدمين و ده بيكون علي شكل ألم أو وخز أو حرقان أو تنميل و بيصاحب الكلام ده ضعف في الإحساس بالألم أو الحرارة و البرودة.و ده بيخلي مريض السكر ممكن يتعور أو يتلسع بمياه سخنة أو حتي يتخلع من رجله الحذاء و ما يلاحظش لو الاحساس متأثر أوي و دي مشكلة خطيرة لازم نخلي بالنا منها .

• ده غير إن السكر كمان مع السنين بيأثر علي الشرايين و بيسبب فيها شوية تصلب أو ضيق و ده بيسبب قصور في الدورة الدموية اللي واصلة للأطراف و خاصة القدم فبيعوق عملية مناعة الجسم ضد أي عدوي ممكن تحصل و بيعوق كمان إلتئام الجرح بسهولة.

• ده كمان غير إن الدم بتاع مريض السكر نفسه وسط جيد جدا لأي ميكروب يقدر يعيش و يتكاثر فيه.

• سبب تاني لمشاكل القدم عند مريض السكر أن تأثير السكر علي الأعصاب بيأثر علي قوة العضلات و شكل القدم و الأصابع اللي في بعض الأوقات بيحصل فيها بعض التغييرات أو التشوهات اللي ممكن تحتاج لحذاء طبي مخصوص.

• حتي الجلد كمان في مريض السكر بيحصل فيه تغيرات و بيكون فيه جفاف و شقوق و ده بيسهل حدوث جروح و عدوي خاصة في الأطراف وأكترها القدم.

• الزوائد الجلديه و الكالو بيتكونوا أكتر في جلد مريض السكر عشان كدة أي إزالة لها ممكن يسبب جروح أو قرح بالقدم .

كل دي كانت أسباب تخلي مريض السكر عرضة أكتر من أي حد لمشاكل القدم و تخليه لازم يكون أكتر واحد في العالم بيهتم بقدمه.

إزاي نعتني بالقدم في مريض السكر؟
إمتي و إزاي أفحص القدم؟ و إمتي أروح لدكتور يفحصها؟
إزاي نتجنب حدوث أي مشاكل في القدمين؟
إزاي نتعامل مع مشاكل القدمين ؟

كل حد عنده في البيت مريض سكر،و لأي حد يعرف مريض سكر هنقوله نصايح تحميه من حدوث أي مشاكل بالقدم و تحافظ علي صحة قدمه :

١. إلبس حذاء واسع و مريح دايماً و في حالة حدوث أي تغيير أو تشوه في شكل القدم أو الأصابع خد رأي طبيبك في إستخدام حذاء طبي مفصل مخصوص لقدمك

٢. غسل القدمين بانتظام صباحاً و مساءاً بالماء و الصابون.

٣. إختبار حرارة الماء قبل غسل القدمين و نستخدم الكوع للاحساس بدرجة الحرارة.

٤. تجفيف القدمين جيدا بعد الغسيل و وضع طبقة رقيقة من كريم مرطب أو فازلين طبي.

٥. لبس شرابات قطن خفيفة مافيهاش خياطة كتير.

٦. لو ظهر عندك أي كالو أو زوائد جلدية ما تحاولش تشيلها بنفسك لأن ممكن تتجرح أو تسيب مكانها قرحة،خلي الدكتور يشيلهالك بنفسه.

٧. إستخدم الحجر الخفاف (حجر أسود بيكون موجود عند العطار و في الصيدليات) علي الجلد الجاف في القدم يوميا و وحط بعدها كريم مرطب أو فازلين طبي.

٨. روح للدكتور لو لاحظت أي جرح أو قرحة أو تغيير في لون القدم أو أي جزء منها.

٩. إفحص قدمك جيدا يومياً و إستخدم مراية عشان تشوف رجليك من تحت و بص كويس بين الصوابع و لو نظرك ضعيف هنخلي حد في البيت دايما دي مهمته اليومية.

١٠ . قلل الملح في الأكل و تجنب الدهون و تجنب التدخين.

١١ . مارس الرياضة أو المشي بانتظام للمحافظة علي نشاط الدورة الدموية.

١٢. بص كويس في الحذاء قبل ما تلبسه و شيل منه أي حاجة صغيرة ممكن تكون موجودة جواه .

١٣ . دفي رجليك كويس لما يكون الجو برد باستخدام الشراب و الغطاء و تجنب أن رجلك تكون قريبة من الدفاية لتنجنب حدوث حرق لا قدر الله.

١٤ . إفحص رجلك عند الدكتور مرة في السنة عشان يطمئن علي النبض في الشرايين الطرفية و في حالة وجود أي مشكلة في الدورة الدموية أو الأعصاب أو وجود أي مشاكل بالجلد أو تشوهات بشكل القدم أو جروح أو قرح أو إلتهابات فطرية أو غيره من المشاكل هيقوم بعلاجها بشكل سليم و هيوجهك للطريق الصحيح.

‎دكاترة هوسبيتاليا معاكم ٢٤ ساعة طوال أيام الاسبوع لأي استفسار او زيارة منزلية

‎كلمنا دلوقتي علي 01100080900

Call Now Button
Need Help? Chat with us