fbpx

خطر الأفراط في استخدام المضادات الحيوية

المضادات الحيوية

الإسبوع العالمي للتوعية بالمضادات الحيوية

بداية من ١٣ نوفمبر و لمدة اسبوع يبدأ الاسبوع العالمي للتوعية بالمضادات الحيوية …

مع هوسبيتاليا هنتكلم معاكم عن معلومات بسيطة و مهمة جداً عن سوء استخدام المضادات الحيوية !!

في تصريح جديد لمنظمة الصحة العالمية إن مقاومة البكتريا للمضادات الحيوية الموجودة في العالم هتؤدي لوفاه ١٠ ملايين شخص بحلول عام ٢٠٥٠ !!!

طب معني الكلام ده ايه؟

معناه مصيبة…معناه أن فيه ٥٠ مليون واحد هيموتوا بسبب عدوي بكتيرية زي إلتهاب الحلق أو إلتهاب الشعب الهوائية أو إلتهاب مجري البول بسبب إن مفيش ولا مضاد حيوي في العالم قادر يقتل البكتيريا اللي عندهم.

طب إيه السبب في كدة؟

السبب في كدة هو سوء إستخدام المضادات الحيوية اللي حصل في العالم و خاصة في الدول الغير متقدمة و الدول اللي ماعندهومش وعي صحي زي حالاتنا كدة.
بنشوف الطفل اللي كل مايجيله نزله برد و لا سخونية مامته تجري تجيب إزازة المضاد الحيوي و تديله منه بدون إستشارة دكتور و بدون الأخذ في الاعتبار أن قرار أخذ مضاد حيوي مش حاجة سهلة كدة.

مبدئيا يا جماعة المضاد الحيوي ده بيتاخد في حالات العدوي البكتيرية بس و ده بيتم تشخيصه بعد فحص المريض بواسطة دكتور متخصص لمعرفة سبب ارتفاع الحرارة و تحديد مصدر العدوي إذا كان سبب السخونية عدوي (و ده لأن فيه أمراض تانية من أعراضها الحرارة زي ضربة الشمس،الإجهاد الحرار،سرطان الدم،و غيرهم كتير) ثم تحديد هل العدوي دي بكتيريا و لا فيروس و لا طفيليات إما عن طريق الكشف الطبي أو الفحوصات الطبية لو الكشف مش مبين.

بعد كدة يا سيدي لو إتأكدنا أن دي عدوي بكتيرية (و ده إحتمال لا يتعدي ١٥٪)في الغالب بنحتاج نعمل مزرعة لتحديد نوع البكتريا و نوع المضاد الحيوي المناسب لعلاجها و دي بتكون حسب التشخيص يعني ممكن نحتاج مسحة من الحلق،مزرعة بول،مزرعة بصاق أو مزرعة دم علي حسب الحالة.

بعد كدة بقي بنحسب الجرعة علي حسب الوزن و بنحسب المدة اللي هنستعمل المضاد الحيوي فيها علي حسب التشخيص ووفقا لبروتوكولات عالمية.

حضرتك بقي لما بتلغي ده كله و تروح تجيب مضاد حيوي من نفسك أو بعد نصيحة صيدلي أو مكالمة تليفونية من والدة حضرتك إنت بتعمل جريمة مش في حق نفسك بس لأ في حق البشرية كلها.

نزلة البرد اللي حضرتك خدتلها مضاد حيوي أقراص أو حتي حقن دي فيروس و بتخف لوحدها و كل اللي حضرتك كنت محتاجة شوية راحة و سوائل و خوافض للحرارة و المضاد الحيوي اللي حضرتك أخدته أو إديته لإبنك ولا والدتك ما كانش له أي لازمة و كمان ده بيدي مناعة للبكتريا المختلفة من المضادات الحيوية و بيقتل البكتريا النافعة اللي موجودة في جسمنا.

يعني حضرتك مع تكرار الموضوع ده معرض انك يحصلك أي عدوي و مانلاقيش لها علاج بسبب أن البكتريا أصبحت عنيفة جدا و مقاومة لكل أنواع المضادات الحيوية.

يعني معني كدة أن هنموت بعد كدة بسبب أمراض معدية كانت قبل كدة مناعتنا بتتغلب عليها من غير علاج أصلا.
إمنعوا الكارثة دي يا جماعة.
المضاد الحيوي مش علاج لأي حاجة.
المضاد الحيوي لازم يكتبه الدكتور بعد الكشف الطبي و التشخيص الدقيق لعدوي بكتيرية مع مراعاة النوع و الجرعة المناسبة.
ما تكررش مضاد حيوي أخدته قبل كدة من نفسك حتي لو كانت نفس الاعراض اللي اتكتبلك عشانها…الأعراض متشابهة لكن الاسباب متعددة .

أحجز زيارة منزلية مع نخبة من أفضل المتخصصين في القاهرة و الجيزة

من خلال : 01100080900

Call Now Button
Need Help? Chat with us