fbpx

قرح الفراش – Bedsores

قرح-الفراش-هوسبيتاليا

ساعات بنسمع عن قرح الفراش أو قرح الضغط
( Bed sores or pressure ulcers )

بس كتير مننا ما يعرفهاش أو ما إتعاملش معاها و كتير مننا شافها قبل كدة أو حصلت له أو لحد يعرفه لكن اللي مافيش فيه شك أنها مشكلة صحية خطيرة بتهدد حياة أي شخص تحصله.

خلينا نتعرف علي قرح الفراش إيه هي و بتحصل إزاي و ايه أسبابها و مين الناس الأكتر عرضة لحدوثها.

قرح الفراش هي تقرحات بتحصل في الجلد و الأنسجة اللي تحت الجلد في المناطق من الجسم المعرضة للضغط لفترات طويلة في أي شخص طريح الفراش أو غير قادر علي تقليب نفسه في السرير لأي سبب سواء كان بعد جراحة أو بسبب كسر أو حادث أو شلل لا قدر الله.

من أكثر الأماكن في الجسم اللي بتتعرض لقرح الفراش هي مناطق الكعبين و المقعدة و الفخذين و ده سببه أن المناطق دي معرضة للضغط أكتر.

قرح الفراش ممكن تبدأ تحصل في أيام لكن علاجها بياخد شهور و سنين و فيه قرح بتوصل لدرجات صعب جدا انها تلتأم لوحدها و بتحتاج عمليات ترقيع و اللي مش في كل الأوقات بتنجح . عشان كدة لو عندك أي حد معرض لقرح الفراش لازم تاخد كل الاحتياطات اللازمة لتجنب حدوث قرح الفراش.

طيب تعالوا نشوف أعراض قرح الفراش عشان نقدر نلاحظ أي بدايات قرح صغيرة في الجلد و نتعامل معاها قبل ما تزيد و تسبب مشاكل كبيرة :

• أول حاجة تغيير لون الجلد في أي منطقة عن باقي لون الجلد اللي حواليه.
• تورم أي جزء في الجلد عن باقي الجلد اللي حواليه .
• نزول أي إفرازات أو صديد من أي منطقة في الجلد.
• تغير درجة حرارة الجلد سواء بالسخونة أو البرودة عن باقي الجلد.

قرح الفراش درجات مختلفة علي حسب حجمها ووعمقها من القرح السطحية (الدرجة الأولى) اللي بيكون الجلد فيها هو بس اللي بدأ يصاب للقرح العمقية (الدرجة الرابعة) و اللي بتوصل للعضم نفسه.

تابعونا قريبا هنكمل كلامنا عن قرح الفراش و هنشوف طرق الوقاية و العلاج من قرح الفراش بداية من القرح السطحية للقرح من الدرجة الرابعة.

إتكلمنا عن أعراض قرح الفراش و قلنا إنها بتبدأ في أيام لكن علاجها بياخد شهور و ساعات سنين و قلنا إن أي تغير في لون الجلد أو شكله أو درجه حرارته أو نزول أي إفرازات أو صديد من الجلد لازم ناخده بجدية و نبدأ نقلل الضغط علي المنطقة دي و ننظفها كويس بمحلول ملح مرتين يوميا و نغطي الجلد بغيار طبي معقم لو الجلد فيه جرح أو تشقق أو تقرح و لو مش شايف تحسن فيها بعد الكلام ده لازم تعرضه علي طبيب جراحة أو طبيب أسرة لتقييم الحالة و تحديد نوعية العلاج المناسب لها.

طيب لو عندي حد طريح الفراش أو بيستخدم كرسي متحرك إزاي أساعده يحمي نفسه من قرح الفراش؟

أهم حاجة هي تغيير وضع الجسم كل شوية يعني لو قاعد علي كرسي متحرك بنحاول نرفع كتله الجسم من علي الكرسي مرة كل ربع ساعة و نغير وضعية الجسم نفسه كل ساعة و لو نايم علي السرير يكون التقليب كل ساعتين.

لازم نحافظ علي الجلد نضيف و جاف و نستعمل حاجات مرطبة للجلد خاصة مع إستخدام الحفاضات (زي كريم أوكسيد الزنك).

إستخدام المساند أو طوق هوائي لرفع الأماكن المعرضة للقرح زي المقعدة أثناء الجلوس ع الكرسي و النوم علي السرير.

– إستخدام المرتبة الهوائية للمرضي الملازمين للفراش.

– تفقد الجلد ووفحصه يوميا و طلب المشورة الطبية لو لاحظنا أي حاجة مش طبيعية في الجلد.

– التغذية السليمة و الأكل الصحي المتوازن المناسب لكل حالة و الابتعاد عن التدخين .

فيه أكتر من نقطة تهمنا في تشخيص قرح الفراش لأنها بتفرق في العلاج:

أولا القرحة مكانها فين؟ ثانيا القرحة دي من الدرجة الكام؟ ثالثا هل هي نضيفة ولا فيها عدوي أو خلايا ميتة محتاجة تدخل جراحي لتنضيفها.رابعا هل فيه أمراض مزمنة مصاحبة زي ضغط أو سكر أو مشاكل بالقلب و الأوعية الدموية؟ خامسا هل حصل مضاعفات بسبب قرح الفراش زي أنيميا أو نقص نسبة الألبيومين في الدم أو تلوث بالدم ناتج عن العدوي ولا لأ؟ سادسا هل القرحة هتحتاج غيارات عادية ولا هتحتاج إستخدام جهاز الشفط أو الضغط السلبي (VAC)؟ ، هل القرحة هتحتاج جراحة الترقيع ولا لأ،عدد القرح كام؟
وحاجات تانية كتيرة زي درجة وعي المريض و مدي قدرته علي الحركة أو إستخدام كرسي متحرك و حالته العامة و نظامه الغذائي و البيئة المحيطة بالمريض و الأفراد المرافقين له.

في علاج قرح الفراش غالبا بنحتاج فريق متكامل من طبيب الأسرة و طبيب جراحة و ممرض مدرب علي التعامل مع القرح و الجروح.و أحيانا بنحتاج جراح تجميل أو طبيب جلدية أو جراح عظام أو طبيب تغذية أو أخصائي نفسي أو علاج طبيعي علي حسب الحالة .

بعد ما شخصنا الحالة بنبدأ نحط خطة العلاج اللي بتختلف من مريض لمريض و من قرحة لقرحة علي حسب الحالة و دايما بنقول أن الوقاية خير من العلاج و الإجراءات الوقائية البسيطة اللي ممكن نعملها هتقلل كتير من احتمالية الإصابة بقرح الفراش .نفكركم إزاي نساعد أي حد معرض لقرح الفراش و نتجنب حدوثها :

• أهم حاجة هي تغيير وضع الجسم كل شوية يعني لو قاعد علي كرسي متحرك بنحاول نرفع كتله الجسم من علي الكرسي مرة كل ربع ساعة و نغير وضعية الجسم نفسه كل ساعة و لو نايم علي السرير يكون التقليب كل ساعتين.

• لازم نحافظ علي الجلد نضيف و جاف و نستعمل حاجات مرطبة للجلد خاصة مع إستخدام الحفاضات (زي كريم أوكسيد الزنك).

• إستخدام المساند أو طوق هوائي لرفع الأماكن المعرضة للقرح زي المقعدة أثناء الجلوس ع الكرسي و النوم علي السرير.

• إستخدام المرتبة الهوائية للمرضي الملازمين للفراش.

• تفقد الجلد ووفحصه يوميا و طلب المشورة الطبية لو لاحظنا أي حاجة مش طبيعية في الجلد.

التغذية السليمة و الأكل الصحي المتوازن المناسب لكل حالة و الابتعاد عن التدخين .
زي ما قلنا العلاج بيختلف من حالة لحالة و من قرحة لقرحة لكن فيه قواعد أساسية في التعامل مع أي قرحة فراش:

• التقليب و تعديل وضع الجسم باستمرار لتخفيف الضغط عن مناطق القرح و لتجنب حدوث قرح جديدة.

• في حالة أن القرحة مش نضيفة أو بتجيب صديد أو إفرازات أو فيها أنسجة ميتة لازم طبيب الجراحة ينضفها كويس و يشيل أي أنسجة ميتة أو تالفةعع لأنها مش هتلتأم غير لما تكون نضيفة خالص .

• الغيار علي القرحة بانتظام علي حسب الطريقة المناسبة اللي يحددها الدكتور.

• القرح اللي مش بتلتأم رغم أنها نضيفة ممكن يتعمل لها جراحة للترقيع بواسطة طبيب جراحة تجميل و اللي بياخد أنسجة سليمة من الجسم نفسه زي العضلات و الجلد و يرقع بيها مكان القرحة.

• بعض القرح بتحتاج لجهاز الشفط أو الضغط السلبي (VAC) و ده من الحاجات الجديدة اللي بتجيب نتايج كويسة جدا لأنه بيعمل ضغط سلبي داخل القرحة و ده بيشفط أي صديد أو إفرازات منها و بيحافظ عليها نضيفة و بيساعد علي الالتئام.

• نظام أكل صحي ومتوازن علي حسب الحالة.

• إستخدام الأدوية المناسبة من مضادات حيوية أو مضادات الالتهاب علي حسب الحالة.

• جلسات علاج طبيعي أو إرشاد نفسي للمريض و الأسرة عن كيفية التعامل مع الضغط العصبى الشديد المصاحب لقرح الفراش.

ما تنساش تحافظ عليهم و من قرح الفراش تحميهم.

هوسبيتاليا بتطمنك إن كل الفريق اللي ممكن تحتاجة لمواجهة قرح الفراش موجود و جاهز لمساعدتك في أي وقت .

كلمونا دلوقتي علي: 01100080900

فريق هوسبيتاليا الطبي معاكم ٢٤ ساعة طوال أيام الاسبوع للزيارات المنزلية لكل العيلة في القاهرة و الجيزة.

Call Now Button
Need Help? Chat with us