fbpx

مرض السكتة الدماغية

هوسبيتاليا السكتة الدماغية
٤ ساعات تفرق في حياة كتير هوسبيتاليا معاكم النهاردة هنتكلم عن تاني أكتر سبب للوفيات في مصر بعد أمراض القلب، و اللي بيمثل حوالي ١٤٪ من نسبة الوفيات في مصر و هو السكتة الدماغية. السكتة الدماغية حسب آخر تقارير بتصيب أكتر من ٢٧٠ ألف مصري سنويا و اللي نسبة كبيرة منهم بتكون السكتة الدماغية سبب في وفاتهم أو أنهم يكملوا حياتهم بإعاقة مستديمة زي الشلل أو فقدان الإحساس أو فقدان لنعمة البصر أو السمع أو الكلام بشكل كلي أو جزئي. احنا بنتكلم النهاردة في مريض لازم التعامل معاه علي وجه السرعة عشان يتلحق في خلال الأربع ساعات الأولي من حدوث السكتة الدماغية قبل ما الدم اللي واصل لجزء من المخ يقل و يحصل فيه تلف و ضمور غير قابل للعلاج بعد الكام ساعة دول،يعني لازم نتحرك في أسرع وقت لو شكينا واحد في المليون أن المريض ده حصله سكتة دماغية . عوامل الخطورة اللي ممكن تخلي حد أكثر عرضة من غيره لحدوث السكتة الدماغية و دي بتنقسم لنوعين من الأسباب،أسباب تتعلق بأسلوب الحياة بتاع الشخص و أسباب تتعلق بالحالة الصحية للشخص نفسه: نبدأ بالأسباب اللي بتتعلق بأسلوب الحياه الخاطئ واللي معظمنا عايشينه رغم درايتنا بخطورة أسلوب الحياة الخاطئ : ١/ زيادة الوزن و السمنة. ٢/ التدخين. ٣/ شرب الكحوليات. ٤/ نمط الحياة المتكاسل و عدم ممارسة الرياضة. ٥/ المخدرات و من أشهرها الكوكايين و الهيروين و الأمفيتامينات. و فيه أسباب أو ظروف صحية معينة ممكن تخلي شخص أكثر عرضة من غيره لحدوث السكتة الدماغية: ١/ إرتفاع ضغط الدم. ٢/ مرض السكري. ٣/ إرتفاع نسب الكوليسترول في الدم و تصلب الشرايين. ٤/ أمراض القلب والأوعية الدموية زي عدم إنتظام ضربات القلب و جلطات القلب وأمراض صمامات القلب المختلفة. ٥/ العمر : رغم إمكانية حدوثها في أي سن لكن الفئة فوق ال ٥٥ سنة أكثر عرضة من غيرهم لحدوث السكتات الدماغية. ٦/ الجنس : الرجال أكثر عرضة من النساء في التعرض للسكتات الدماغية لكن النساء أكتر عرضة للوفاة بعد حدوث السكتة الدماغية. ٧/ العرق البشري : الأمريكان من أصول إفريقية هم الأكثر عرضة لحدوث السكتات الدماغية أكثر من باقي الأعراق. ٨/ إستخدام وسائل منع الحمل اللي تحتوي علي هرمون الإستروجين بيزيد احتمالية الإصابة بالسكتة الدماغية. بعد ما عرفنا عوامل الخطورة اللي ممكن تزيد احتمالات إصابة أي شخص للسكتة الدماغية طبعا أدركنا أن المجموعة الأولي من الأسباب و اللي بتتعلق بأسلوب الحياة كلها أسباب في إيدينا تجنبها و البعد عنها بشوية حاجات بسيطة زي تنظيم الأكل و الرياضة و تجنب التدخين و الكحوليات و المخدرات و عيش حياه صحية،أما المجموعة الثانية من الأسباب فهي أسباب لا يمكن تجنبها و لكن يمكن السيطرة عليها بتزبيط الأمراض المزمنة زي الضغط و السكر و أمراض القلب و الكوليسترول و تصلب الشرايين و أحيانا إستخدام أدوية مضادة للصفائح الدموية أو مسيلات الدم كوقاية من السكتات الدماغية. أهمية ال ٤ ساعات الأولي في تشخيص الحالة و علاجها للوصول لأفضل النتائج الممكنة و تقليل الضرر اللي ممكن تتسبب فيه السكتة الدماغية قدر الإمكان. لازم مبدئيا نفرق بين الأسباب المختلفة للسكتة الدماغية لأن رغم أن الأعراض متشابهة بس طريقة العلاج مختلفة تماما. دايما السكتة الدماغية سببها تلف جزء في المخ ناتج عن توقف مفاجئ لوصول الدم المغذي للجزء ده من المخ لأحد الأسباب، و عندنا ٣ أنواع للسكتات الدماغية (Cerebrovascular Stroke) و هما: ١ / جلطة المخ (Ischemic Stroke): و دي بيحصل فيها انسداد في أحد شرايين المخ و توقف وصول الدم لجزء من المخ. ٢/ نزيف المخ (Hemorrhagic Stroke): و ده بيكون سببه تسريب من أحد الشرايين أو إنفجار للشريان نفسه مما يؤدي برضه لتوقف وصول الدم للجزء من المخ اللي بيغذيه الشريان المصاب. ٣/ فيه كمان نوع تالت بنسميه جلطة مؤقتة بالمخ أو جلطة مصغرة (“Transient Ischemic Attack “TIA) و دي بتكون زي جلطة المخ في الأعراض لكن لفترة مؤقتة بس يعني شريان معين بيحصل إنسداد أو ضيق فيه بس ما بيحصلش تلف دائم في المخ و بتعدي علي خير لكن الشخص ده بيكون عرضة لحدوث سكتة دماغية في وقت لاحق و محتاج علاج وقائي. طيب ايه هي الأعراض اللي ممكن تخلينا نفكر في السكتة الدماغية ؟ ١ / ضعف الحركة أو الإحساس في جزء من الجسم أو وجود تنميل و خدر مفاجئ و غالبا ما يكون في صورة شلل نصفي (ذراع و ساق علي نفس الناحية) . ٢/ فقدان القدرة علي النطق أو ثقل باللسان أو لعثمة أو كلام غير واضح أو غير مفهوم. ٣/ تدهور درجة الوعي أو حدوث إغماء مفاجئ أو الدخول في غيبوبة. ٤/ عدم القدرة علي فهم الكلام أو التوهان أو الإرتباك الملحوظ و المفاجئ. ٥/ فقدان الرؤية بأحدي العينين أو كلاهما. ٦/ ضعف ببعض عضلات الوجه و إعوجاج الفم و سيلان اللعاب من جانب الفم و أحياناً يصاحبه عدم القدرة علي غلق احدي العينين في حالة تأثر العصب السابع. ٧/ صداع جديد شديد و مفاجئ . ٨/ قئ شديد لا يتحسن. ٩/ حدوث مشكلة مفاجئة في المشي أو التوازن و قد يحدث سقوط للمريض فجأة. ١٠/ حدوث مشكلة مفاجئة في الذاكرة. طيب لو شكيت إن حد مصاب بسكتة دماغية إزاي أتصرف ؟ أولا لازم نفكر بسرعة و ناخد القرار بسرعة و نتحرك بسرعة عشان كدة عملوا حاجة إسمها FAST و دي طريقة سريعة عن طريق ٤ خطوات نعملهم بسرعة لو شكينا في سكتة دماغية: FAST ( Face,Arm, Speech, Time)… يعني إيه ؟ ١/ حرف ال F يعني Face : إطلب من المريض أنه يبتسم و تبص علي الفم و تشوف هل في إعوجاج و لا لأ. ٢/ حرف A يعني Arms : إطلب من المريض يرفع ذراعاته كل واحد لوحدة و شوف لو فيه شلل أو ضعف في أحد الذراعين. ٣/ حرف S يعني Speech : إطلب من المريض يقول كلمات أو جمل بسيطة بالنسبة له زي إنه يقرأ الفاتحة مثلا و شوف لو فيه أي صعوبة أو مشاكل في الكلام. ٤/ حرف T يعني Time : يعني الوقت الوقت الوقت يعني لو لقيت أي مشكلة في الحاجات دي هتطلب الإسعاف أو تنقل المريض لأقرب مستشفي في أقرب وقت عشان نلحق نعمل حاجة نساعد بيها المريض قبل ما يعدوا ال ٤ ساعات و يكون جزء هام من المخ إتأثر و حصل فيه تلف أو ضرر غير قابل للتصليح. أحجز زيارة منزلية مع نخبة من أفضل المتخصصين ٢٤ ساعة أو من خلال : 01100080900 أو عن طريق موقعنا من هنا
Call Now Button
Need Help? Chat with us