fbpx

نوبات الهلع – Panic Attacks

نوبات الهلع - هوسبيتاليا

نوبات الهلع – Panic Attacks

#متخافيش !! 😲😲

كتير مننا حصلت له مرة أو إتنين بس في حياته كلها نوبة هلع (Panic attack) غالبا بعد المرور بموقف عصيب و شاف إزاي الموضوع مرعب جدا و متعب جدا و تجربة ما تتمناش انها تتكرر تاني، بس فيه ناس بيتعرضوا لنوبات الهلع بصورة متكررة و بيقضوا وقت كبير من حياتهم خايفين يتعرضوا لنوبة هلع جديدة و ده اللي بنسميه إضطراب الهلع و دول بننصحهم إنهم مايستسلموش للخوف و يبدأوا فورا بطلب المشورة الطبية و يبدأوا العلاج و بطمنهم أن العلاج فعال بدرجة كبيرة و معظم الناس بتتحسن جداً و ده بيأثر بالإيجاب علي جودة حياتهم.

*طيب تعالي نتخيل إيه اللي بيحصل في نوبة الهلع ؟؟

تخيل حضرتك قاعد في أمان الله لقيت داخل عليك أسد و باصصلك كدة بصة واحد ما أكلش من يومين و بدأ يجري عليك….هو ده بالظبط الاحساس اللي هتحسة في نوبة الهلع بس من غير و لا أسد و لا قطة و لا أي حاجة.رعب و خوف رهيب مفاجئ بدون وجود حاجة معينة مخوفاك و بدون أي سابق إنذار، ناس كتير بتوصفه إنك بتحس إنك خلاص بتموت و إن هي دي سكرات الموت فعلا (و خاصة في أول تجربة) و ناس بتحس إن دي أعراض أزمة قلبية بس المهم انك بتحس فعلا إنك فاقد السيطرة نهائياً و إنك موقف رهيب.

**طبعاً الخوف و الرعب ده بيعمل لحضرتك أعراض جسمانية عنيفة جداً :
سرعة في ضربات القلب
سرعة في التنفس و
عرق كثيف
رعشة و ألم في الصدر
ضيق بالنفس
صداع
تنميل بالجسم و ميل للقئ
دوار و ممكن إغماء
و أعراض تانية كتير بتختلف من شخص للتاني و ممكن من مرة للتانية…

**طبعا لو تخيلت الموضوع فهو حاجة مؤسفة للي بتحصله و لو تعرف حد بيحصله نوبات هلع أو عنده إضطراب هلع هتعرف إن الموضوع ده رغم أن الناس بتعتبر أنه حاجة نفسية بس و مش خطير صحياً بس هو بيأثر علي حياة الناس دي جداً بالسلب و خاصة أنه أوقات كتير بيصاحبه رهاب Phobia من حاجات معينة زي الأماكن العالية أو الأماكن المغلقة أو بصفة عامة أي مكان صعب الحصول فيه علي مساعدة لو حصلت نوبة الهلع.ناس كتير بتضطر تسيب شغلها أو المدرسة أو بيضطروا ميخرجوش من البيت. نتيجة لكدة بيحصلهم إكتئاب أو إضطرابات نفسية تانية و عزلة إجتماعية بسبب الخوف من تكرار نوبات الهلع، و فيه ناس بتقدم علي الإنتحار أو فعلا بتنتحر !!!

يعني إوعي تكون تعرف جد بيحصل عنده نوبات هلع و تفتكر إن هو بيتدلع أو مزودها، لأ هو فعلا تعبان و محتاج مساعدتك و مساندة كل اللي حواليه .

**طيب إيه هي أسباب نوبات الهلع و اضطراب الهلع؟

السبب غير معروف بس فيه عوامل كتير لها دور في الموضوع زي الجينات و العامل الوراثي،الإجهاد الشديد،الصدمات النفسية الشديدة و الضغوط النفسية الشديدة برضه من العوامل المساعدة.
الموضوع بيبدأ أحيانا من فترة المراهقة و منتشر أكتر في البنات أكتر لكن بيحصل طبعا في الجنسين .

**إمتي أروح للدكتور ؟

• مبدأيا لو حصلت الأعراض اللي قلناها دي لازم طبعاً فحص طبي و ممكن فحوصات لإستبعاد أي سبب عضوي زي الأزمات القلبية أو هبوط السكر أو زيادة إفراز الغدة الدرقية و أمراض تانية ممكن تتشابه أعراضها مع أعراض نوبات الهلع.

• لو نوبات الهلع متكررة.

• لو بقيت معظم الوقت خايف تحصل نوبة الهلع .

• لو نوبات الهلع بدأت تأثر بالسلب علي حياتك.

• لو فيه أي تفكير في الانتحار أو إيذاء النفس .

‎دكاترة هوسبيتاليا معاكم ٢٤ ساعة طوال أيام الاسبوع لأي استفسار او زيارة منزلية

‎كلمنا دلوقتي علي 01100080900

Call Now Button
Need Help? Chat with us